Vindorka 0,7 pst. av samlaðu orkuframleiðsluni í Norra

Nýggjur vindorkumáttur upp á 18,4 MW varð tikin í nýtslu í Norra í fjør.

Samstundis vórðu 14 MW tikin úr framleiðslu.

Tað skrivar Teknisk Ukeblad við norska elveitingareftirlitinum NVE sum keldu.

906 GWh

Sambært NVE framleiddu norsk vindorkuverk 906 GWh í 2010 ímóti 980 GWh árið fyri. Í Norra er vindorkan nú komin upp á tilsamans 435 MW, lutað sundur á 17 vindorkuverk omanfyri 400 kW.

Meðal myllustøddin er útivið 2,2 MW. Vindorkan stóð fyri 0,7 prosentum av landsins samlaðu orkuframleiðslu í fjør.

Hjá flestu orkuverkunum er ársframleiðslan eitt sindur lægri enn roknað varð við. Óneyvar staðsetingar av vindmyllunum elva til óstøðuga framleiðslu, men hetta er kortini ikki øll forkláringin, sigur NVE.

- Høvuðsorsøkin til fallið í framleiðsluni í fjør var, at talan var um eitt óvanliga vánaligt ár til vind, sigur Knut Hofstad, verkfrøðingur á NVE, við Teknisk Ukeblad.