Triðja vatnturbinan á Eiðisverkinum kemur í august

Í sambandi við vatnorkuútbyggingina hjá SEV í Norðureysturoy er neyðugt við eini turbinu aftrat á Eiðisverkinum sunnanfyri Brimnes, sum tí í løtuni verður útbygt 12 metrar norðureftir.

Byggifelagið MT Højgaard stendur fyri jørð- og betongarbeiðnum, sum byrjaði í august/september í fjør og eftir ætlan skal vera liðugt tíðliga í heyst.

7,7 MW

Tvær turbinur á 6,3 MW eru frammanundan á Eiðisverkinum.

Nýggja turbinan, ið eins og hinar báðar er keypt frá VOITH í Norra, verður 7,7 MW og verður eftir ætlan í Føroyum í august.

Miðað verður eftir at taka hana í brúk um ársskiftið.

Tær báðar verandi Francis turbinurnar á Eiðisverkinum saman við generatorum. 

Sum lið í útbyggingini av verkinum varð fyri tveimum vikum síðani farið undir at leingja føðirørið til turbinurnar til staðið, har nýggja turbinan skal setast upp.

Føðirørið fær vatn úr tí 700 metrar langa rakstrartunlinum úr Eiðisvatni oman til verkið.

Olaf í Garði Joensen, maskinmeistari á Eiðisverkinum, er her á veg niður í føðirørið.

Søldfirðingurin Sæmund Tausen, maskinmeistari (v.m.), hevur verið í starvi hjá SEV síðani 2007. Hann arbeiðir vanliga á Fossáverkinum í Vestmanna, men hevur her tikið málingapensil í hond í sambandi við viðlíkahaldsarbeiði, sum hann og aðrir gera á Eiðisverkinum í løtuni. Høgrumegin stendur ein gamal SEV-kenningur,Jan á Høgaryggi, sum ofta støkkur inn á gólvið at vitja - eins og hann gjørdi í dag. Jan, ið er ættaður úr Nólsoy og nú býr á Eiði (eftir 30 ár í Hvalvík), starvaðist á Eiðisverkinum og Fossáverkinum frá 1988 til 2004, tá hann sum 68 ára gamal gjørdist pensjónistur. 

Ongin framleiðsla

Arbeiðið hevur havt við sær, at ongin framleiðsla hevur verið á verkinum hesar báðar regnmiklu vikurnar, men væntandi verður hon tikin upp aftur mánadagin.

Samlaði kostnaðurin av nýggju turbinuni og útbyggingini av Eiðisverkinum liggur um einar 30 mió. kr.

Føðirørið til triðju turbinuna er komið upp á pláss. Nú verður proppur settur í, so framleiðslan á verkinum kann takast upp aftur. Nýggja turbinan kemur í august og verður eftir ætlan klár at taka í brúk um ársskiftið.