Spáa stóran vøkstur í oljunýtslu

Altjóða oljustovnurin IEA roknar við nógv størri eftirspurningi eftir olju næstu fimm árini enn higartil roknað við.

Roknað verður við, at heimsbúskapurin í 2016 fer at brúka 95,3 mió. tunnur av olju um dagin ímóti 88 mió. tunnum um dagin í 2010, stendur í hálvársforsøgnini Medium-Term Oil Market Report, sum IEA almannakunngjørdi í dag.

Hetta svarar til ein árligan vøkstur upp á í miðal 1,2 mió. tunnur av olju um dagin. Í seinastu forsøgnini í desember væntaði IEA ein árligan vøkstur upp á bert 500.000 tunnur um dagin fram til 2015.

Dýr olja tungt fyri vesturheimin

Kina fer einsamalt at standa fyri ikki minni enn 41 pst. av vøkstrinum í oljunýtsluni næstu árini, metir IEA.

Altjóða oljustovnurin sigur, at ein oljuprísur oman fyri 100 dollarar er eitt tungt ok at bera hjá londunum í OECD, meðan menningarlondini við Kina á odda tykjast at vera meiri mótstøðufør mótvegis høgu oljuprísunum.

- Nýggja forsøgnin hjá IEA av vøkstrinum í oljunýtsluni er merkisverd, hóast tað ikki kemur óvart á nakran, at Kina fer at vera orsøkin til vøksturin. Sjálvt um tað er rætt, at ein oljuprísur upp á 100 dollarar sum frálíður kann hava álvarsama ávirkan á búskapin í ídnaðarlondunum, haldi eg, at hægri oljuprísir eru neyðugir til tess at minka um eftirspurningin, sigur Andrey Kryuchenkov, oljugreinari í VTB Capital í London, við Bloomberg News.

Økir framleiðslukapasitetin

Høgi oljuprísurin fer samstundis at bera í sær eina øking av framleiðslukapasitetinum i framtíðini, heldur IEA. Men tó ikki nærtil so nógv sum nýtslan, sum alt annað líka fer at økja trýstið á oljuveitingina.

IEA roknar við, at framleiðslukapasiteturin árliga fer at vaksa við 1,1 mió. tunnum um dagin til 100,6 mió. tunnur í 2016 ímóti 93,8 mió. tunnum í 2010.