Sólstormur kann sløkkja ljósið á Jørðini
Útlitini fyri, at ein sokallaður sólstormur fer at raka Jørðina í 2013, hava givið bretskum politikarum ennisrukkur.
Orsøkin er, at sólstormurin í ringasta føri kann bera í sær, at stórir partar av Jørðini mugu klára seg uttan streym í mánaðir.
Tá sólstormur er, slongja ógvusligar spreingingar í magnetfeltinum hjá Sólini ovurhonds stórar nøgdir av orku móti Jørðini. Hetta kann gera stóran skaða á telesamskifti og elveiting.
Stúrin ráðharri
Bretski verjumálaráðharrin, Liam Fox, hevur á eini altjóða ráðstevnu í London sett fokus á vandarnar, ið sólstormurin kann elva til á Jørðini.
Talan kann í ringasta føri verða um, at øll streymveitingin í stórum pørtum av heiminum verður løgd lamin í tímar, vikur ella enntá mánaðir. Harvið verður onki internetsamband.
- So hvørt sum okkara tøknifrøði verður alt meira kompleks, verður hóttanin ímóti okkum eisini størri og meira umfatandi.
- Meðan vit øll njóta væl av teimum tólum, ið skapt verða í kjalarvørrinum av vísindaligum framstigum, verða vit samstundis meira viðbrekin mótvegis tildømis sólstormum og yvirgangsatsóknum, segði Liam Fox sambært tíðindastovuni Press Association.
Nasa ávarar
Amerikanska rúmdarstøðin Nasa boðaði í síðsta mánaða frá vandanum fyri einum sólstormi.
Hetta hendi í sambandi við ein minni sólstorm, sum rakti magnetfeltið hjá Jørðini 3. august.
Sólstormurin elvdi til ein geomagnetiskan storm, sum vardi í næstan 12 timar - nóg leingi til at ein ljósglæma breiddi seg á himmalinum allan vegin úr Evropa til Norðuramerika.
Ógvusligur sólstormur í 1859
Men hetta var í roynd og veru bert ein minni útgáva av einum sólstormi. Ógvusligir sólstormar koma fyri umleið eina ferð í hvørjari øld.
Tann seinasti var í 1859. Tá varð tátíðar mest framkomna samskiftisútgerðin - telegrafurin - løgd lamin, og tveir triðingar av himmalinum vóru blóðreyðir sum avleiðing av storminum.
Granskarar meta, at ein sólstormur av hesi stødd hevði elvt til miklan skaða á nútíðar globala undirstøðukervið og elveitingina.
Fáa ikki vart okkum
Norski stjørnufysikarin, Knut Jørgen Røed Ødegaard, sigur við dagblaðið VG, at ein komandi sólstormur kann fáa álvarsamar avleiðingar.
- Vit kunnu ikki verja okkum ímóti slíkum ógvusligum sólstormum. Elnet og fylgisveinar verða harðast rakt, sigur Ødegaard.