Sev dagførdan samleika
Dagførdi samleikin er tíðarhóskandi og endurspeglar grundvirðini hjá Sev. Við íblástri úr føroysku listasøguni er ein dragandi og umboðandi samskiftisleistur skaptur.
Í 2014 setti Sev kósina, sum hevur til endamáls, at øll elorka skal stava frá varandi orkukeldum í 2030, og síðan tá hevur Sev arbeitt miðvíst fram ímóti at røkka hesum máli. Føroyar eru tí longu væl á veg at gerast eitt av fremstu londum í heiminum innan burðardygga orku.
Hetta við at stremba eftir at menna varandi orkukeldur, sum eru tíðarhóskandi, sæst í dag eisini aftur í dagførda samleikanum. Sev hevur verið í einum hóvligum samleikaskifti seinasta hálva árið, sum nú er komið á mál.
— Dagførdi samleikin endurspeglar okkara fokus á menning og at ganga nýggjar leiðir. Í meira enn 100 ár hava vit føroyingar roynt at tamt okkara náttúrumegi, og ein fyritreyt fyri, at øll elorka kann gerast burðardygg, er áhaldandi at menna slóðbrótandi tøkni, byggja nýggjar skipanir og gera stórar íløgur, sigur Hákun Djurhuus, stjóri í Sev.
Litirnir í dagførda samleikanum eru søguligir
Tá ið Fossáverkið varð bygt á sinni, bleiv listamaðurin Jack Kampmann spurdur til ráðs um litir til Sev. Jack Kampmann mælti til at brúka litirnar grønt, reytt og gult – íblásturin kom millum annað frá okkara ríku náttúru. Og síðan hava júst hesir litir eyðkent bygningar hjá Sev.
Tað var tí heilt natúrligt, at dagførdi samleikin skuldi verða grundaður á litirnar á bygningunum hjá Sev. Myrkagrøna litin kenna vit aftur, meðan appilsinguli liturin er ein samanrenning millum reyða og gula litin frá bygningunum.
— Tað hevur verið umráðandi fyri okkum, at okkara dagførdi samleiki endurspeglar tað, sum vit eru, og tað sum vit gera. Tað er umráðandi at minna á, at Sev arbeiðir fyri allar føroyingar, og tað er okkara ábyrgd at veita orku til øll húsarhald og øll virki í Føroyum - uttan mun til tíð ella stað, sigur Hákun Djurhuus.
Samstundis skal Sev tryggja sama prís fyri øll í Føroyum - uttan mun til, hvar í landinum fólk búgva, og hvussu nógv tað kostar at framleiða streym til tey einstøku økini.
— Tað er eisini umráðandi at vísa á, at henda samhaldsfasta tilgongd skapar tryggleika undir vælferðarsamfelaganum, og bert letur seg gera, tí Sev er eitt felag, sum allir føroyingar eiga, sigur Hákun Djurhuus.
Búmerkið og hvirlan
Dagførda búmerkið er stílreint við smáum bleytum stavum, sum geva eina vinaliga og dámliga kenslu, og bleytu menniskjaligu formarnir síggjast aftur í búmerkinum, sum er innbjóðandi og dragandi.
Hvirlan í gamla búmerkinum hevur fingið eitt talgilt lív. Hvirlan er nú tengd at “live data” yvir elframleiðsluna úr burðardyggari orku, og er sostatt ein livandi løtumynd - ein broytilig og dynamisk endurspegling av, hvussu nógv burðardygg orka verður framleidd júst nú. Ein stillan dag er hvirlan soleiðis næstan ikki at hóma, meðan hon er meira ógvuslig og kraftmikil, tá tað er nógvur vindur og regn.