SEV bjóðar næmingum til orkukapping

SEV bjóðar í hesum skúlaárinum øllum 7. flokkum í landinum at vera við í eini orkukapping undir heitinum "Orkunýtsla nú og í framtíðini.

Kappingin, sum verður í sjey vikur í tíðarskeiðnum 7. januar til 25. februar 2008,  er í tveimum pørtum. Fyrri parturin er um nútíðina, og har skulu næmingarnir m.a. lesa málarar og arbeiða við nýtslutølunum. Flokkurin fær eisini fýra uppgávur um vikuna, sum skulu sendast eini dómsnevnd. Kappingin er í samsvari við tey evni, flokkarnir arbeiða við í ellæruni í alisfrøði. Eisini ber til at arbeiða við evninum í støddfrøði.

Seinni partur er fríari og kann skipast sum ein tvørfaklig verkætlan í eini evnisviku. Har skulu næmingarnir við kreativum framløgum lýsa skúlan og orkustøðuna í skúlanum í 2015. Visión 2015 kann hóskandi brúkast sum grundarlag undir hesum partinum.

Hugsanin er, at næmingarnir kunnu arbeiða saman við lærarum, skúlaleiðslum og húsvørðum í kappingini.

- Ætlanin er, at næmingarnir skulu ogna sær vitan um skynsama orkunýtslu, reinari umhvørvi og sparingar. Harumframt kunnu tey læra, hvønn týdning gott samstarv hevur, og sjálvandi fáa tey eisini nógvar spennandi og stuttligar tímar burturúr, sigur Kristiana Rein, orkuráðgevi hjá SEV, sum skipar fyri kappingini.

Tvær dómsnevndir verða settar at finna fimm teir bestu flokkarnar. Onnur dómsnevndin skal geva stigini í fyrra parti av kappingini, og hin nevndin skal meta um, hvørjir flokkar gera bestu framløgurnar.

Seinasta freist at melda seg tilkappingina er 1. oktober 2007. Framtíðarverkætlanina skal latast í seinasta lagi hósdagin 28. februar 2008. Eina viku seinni, hósdagin 6. mars, verður mett um fimm tær bestu framløgurnar, sum skulu leggjast fram í Norðurlandahúsinum 27. mars, har vinnarin og flokkarnir nummar tvey, trý, fýra og fimm verða almannkunngjørdir.

Høvuðsvinningurin er ein vikuskiftisferð fyri allan flokkin til Íslands við Atlantic Airways. 2. vinningur er ein bowlingtúrur við pitsa fyri allan flokkin, og 3. vinningur er ein biograftúrur við pitsa fyri allan flokkin. 4. vinningur er SEV-hettublusur til flokkin, og 5. vinningur er SEV-blusur til flokkin.