Orkufeløg eggja kundum sínum til at spara orku

Átta av tíggju orkufeløgum í Evropa leggja stóran dent á at eggja kundum sínum til at spara orku.

Hetta vísir ein spildurnýggj kanning, sum felagsskapurin hjá evropeisku orkufeløgunum, Eurelectric, hevur gjørt millum 170 orkufeløg.

Flestu feløgini kunna í dag kundarnar um orkusparingar og bjóða teimum beinleiðis ráðgeving.

Økir um kundaloyalitetin

Umleið helmingurin av feløgunum leggur doyin á at fremja orkusparingar, og hetta økir um kundaloyalitetin, bøtir um umdømið hjá fyritøkunum og økir um handilsmøguleikar teirra.

- Kanningin vísir, at orkufeløgini av álvara hava tikið orkueffektivitet til sín. Hetta hava vit góðar royndir við í Danmark, har orkufeløgini í dag hava skyldu til at veita eina rúgvu av orkusparingum á hvørjum ári, sigur Ulrich Bang, ES-stjóri í Dansk Energi.

Orkufeløgini vísa eisini á, at brúk er fyri størri politiskum og fíggjarligum stuðuli til tess at fremja orkueffektivitet hjá kundunum. Meginparturin av teimum spurdu 170 evropeisku elfeløgunum stuðlar politiskum átøkum, so sum fígging og fremjan av orkueffektiviteti gjøgnum tiltøk frá myndugleikunum.

Forðingar fáast av vegnum

Orkufeløgini vænta, at orkueffektivitetur fer at økja um handilsmøguleikarnar næstu fimm til tíggju árini, men ávara um, at møguleikarnir fyri vøkstri variera millum ymisk sløg av kundum og eru treytaðir av, at beint verður fyri ymsum forðingum.

Ein av størstu forðingunum er avmarkaða vitanin hjá kundunum um orkueffektivitet. Meira enn 70 pst. av fyritøkunum hildu "lítla áhugan" hjá kundunum vera ein stóran trupulleika.

ES-nevndin kemur við einum nýggjum orkueffektivitetsdirektivi í juni, sum m.a. gevur orkufeløgunum ein týðandi leiklut í fremjanini av orkueffektiviseringum í bæði framleiðslu, útbreiðslu og orkunýtslu, skrivar danskenergi.dk.