Ógreið tíðindi frá Vinnumálaráðnum

Landsstýrismaðurin í Vinnumálum vavdi fakta í málinum upp í ein ellubita, tá hann umrøddi varandi orkumøguleikar í útvarpinum í morgun. Hann hevði tískil eina skeiva útlegging av, hvussu lættliga tað ber til at røkka málinum um, at 20 prosent av orkunýtsluni á landi skulu stava frá varandi orkukeldum í 2015.

SEV kennir tað sum sína skyldu at rættleiða landsstýrismannin, tí tað er sera umráðandi at fara realistiskt til verka, tá talan er um so týðandi mál sum at broyta samansetingina av orkukeldum, ið eru ein hornasteinur undir øllum samfelagnum.

Orkunýtslan á landi er tilsamans 52,5 prosent av allari orkunýtsluni, tá orkunýtslan á sjónum er drigin frá. Umroknað til GWt svaraði øll orkunýtslan á landi til 1463,9 GWt í 2005. Av hesum framleiddi SEV 244,9 GWt – tað eru 16,7 prosent. Landsstýrismaðurin vísti í tíðindasendingini hjá útvarpinum á, at tað skuldi borið væl til at rokkið málinum um, at 20 prosent av orkuni á landi skulu fáast til vega frá varandi orkukeldum í 2015. Tað svarar til, at øll framleiðslan hjá SEV og nakað væl afturat skulu koma frá varandi orkukeldum í 2015. Tankin er góður, men havandi í huga veitingarskylduna hjá SEV, krøvini um at orkuberarnir í samfelagnum annars – tað veri seg til hita, bilar o.s.fr. – einhvørja tíð skulu veita støðugua orku og rigga til fulnar, so verður hetta ikki sum stinga frens, so sum útleggingin hjá  landsstýrismanninum bendi á í morgun. Hervið er ikki sagt, at vit ikki skulu hava greið mál á økinum. Vit skulu sjálvandi seta okkum høg mál, men tey skulu samstundis vera realistisk og taka støði í vøkstrinum í orkunýtsluni næstu árini.

Vavdi skeiv tøl saman
Landsstýrismaðurin mistók seg, tá hann samanbar málið um 20 prosent við tey seks prosentini, sum vindmegin gav í 2006. Hesi seks prosentini, talan er um, eru seks prosent av allari framleiðsluni hjá SEV í 2006 og ikki seks prosent av samlaðu orkunýtsluni á landi. Tvs. seks prosent av umleið einum fimtaparti av allari orkunýtsluni á landi í 2006.

Tað ljóðaði sostatt sera einfalt hjá landsstýrismanninum, og tey, sum kanska ikki hugsaðu meira um hesi tíðindini, kundu sita eftir við teirri fatan, at tað snýr bara um at trýfalda framleiðsluna við vindmyllum umframt at taka onkrar aðrar smávegis orkuberar í nýtslu fyri at røkka málinum upp á 20 prosent í 2015. Men so einfalt er tað ikki.

Málið hjá SEV í 2015
SEV setti sær í fjør sítt egna mál at røkka í 2015. Termiska orkan er í løtuni grundarlagið undir 55 prosentum av framleiðsluni. Hini 45 prosentini eru framleidd við varandi orkukeldum - vatni og vindi.

SEV hevur sett sær fyri at venda hesi myndini á høvdið innan 2015. Málið er, at tá skulu 55 prosent framleiðast við varandi orkukeldum og 45 prosent við termiskari orku. Málið skal m.a. røkkast við vatnorkuútbyggingin í Eysturoynni og fleiri vindmyllum.

Málið er sett sambært bæði føroyskum og altjóða tølum um, at elnýtslan í miðal fer at økjast umleið tvey prosent um árið næstu árini.