Nýggjur elkaðal millum Norra og Danmark á veg

Energinet.dk og Statnett undirskrivaðu fíggjadagin sáttmálarnar uppá kaðalarnar til fjórða javnstreymssambandið millum Norra og Danmark, Skagerrak 4.

Sáttmálarnir eru uppá tilsamans slakar 938 miljónir krónur, upplýsa feløgini í tíðindaskrivi.

Kaðalarnir til Skagerrak 4 verða keyptir frá franska kaðalframleiðaranum Nexans og italska felagnum Prysmian.

Nexans skal lata ein 137 km langan sjókaðal um Skagerrak og 12 km langan landkaðal í Norra, meðan Prysmian skal gera ein 91 km langan landkaðal, sum skal gravast niður millum Tjele og Bulbjerg í Norðurjútlandi. Sáttmálin við Prysmian er uppá uml. 300 mió. krónur og við Nexans uppá 638 mió. krónur.

Tríggir elkaðalar frammanundan

Tað eru longu trý javnstreymssambond millum Norra og Danmark, Skagerrak 1-3, og tilsamans hava tey ein kapasitet uppá 1000 megawatt (MW).

Komandi Skagerrak 4-sambandið fær ein kapasitet uppá 700 MW, og sostatt økist kapasiteturin við 70 prosentum til 1700 MW.

Samlaði íløgukostnaðurin er uppá uml. 2,8 mia. krónur. Umframt kaðalarnar umfatar Skagerrak 4-sambandið eisini tvær umformararastøðir í Tjele við Viborg og Kristiansand í Norra.

Sambært tíðarætlanini skal Skagerrak 4 takast í brúk í 2014.