Norra aldrin innflutt meiri streym

Norra innflytur meiri streym enn nakrantíð áður.

Innflutningurin í januar setti met, skrivar Teknisk Ukeblad.

Lítið vatn í norsku goymslunum og stór nýtsla hevur elvt til hægri elprísir í Norra enn í grannalondunum.

- Høgu prísirnir fella sjálvandi ikki í góða jørð hjá norsku brúkarunum, men samstundis kemur innflutningurin væl við, tá lítið vatn er í goymslunum hjá norsku vatnorkuverkunum, sigur Øivind Rue, stjóri í Statnett, í tíðindaskrivi.

Netto-innflutningurin svarar til ársnýtsluna í Tróndheimi

Norra hevði ein netto-innflutning upp á meira enn 2 miljardir kilowatttímar í januar.

– Hetta hevur gjørt tað møguligt at spara upp á vatnið í vatngoymslunum, samstundis sum tað hevur verið við til at lækka prísin sammett við, um vit bert høvdu kunnað brúkt norsktframleidda orku, sigur Statnett-stjórin.

Í meðal innflutti Norra í januar 3.069 MW um tíman. Hetta gav ein netto-innflutning upp á útvið 2,3 TWh (miljardir kilowatttímar), sum svarar til ársnýtsluna í Tróndheimi. Til sammetingar var nýtslan í januar í meðal 18.282 MW ella samanlagt 13,6 TWh.