- Mugu skatta øðrvísi í framtíðini

Stundin er komin til nýhugsan um, hvussu vit áleggja skatt á fyritøkur og einstaklingar.

Tað heldur Connie Hedegaard, ES-veðurlagskommisserur.

Hon mælir í hesum sambandi til at broyta skatta- og avgjaldsskipanirnar soleiðis, at skattur verður lagdur á "tað vit brenna, ístaðin fyri tað vit forvinna", skrivar heimasíðan Euractiv.

– Líta vit 20 ár fram í tíðina, duga øll at síggja, at vit eiga at leggja meira skatt á tilfeingið og minni á arbeiðsavrikini, sigur Hedegaard sambært heimasíðuni.

Effektivitetur flaggskipið í øllum

ES-kommisserurin hevur fingið eyguni upp fyri, at tað at orkueffektivisera og brúka heimsins avmarkaða tilfeingi effektivari, er einasta loysnin til tess at tryggja burðardyggan vøkstur. Effektivitetur eigur at vera flaggskipið í øllum tí, vit takast við, sigur hon og vísir á, at Svøríki og Danmark ikki hava mist kappingarføri av sínum effektiviseringsátøkum á orkuøkinum.

ES-nevndin leggur í mars fram ætlanir sínar á orkuøkinum fram til 2050. Har verður kósin løgd til tess at ES skal megna at fremja ein niðurskurð í veðurlagsútlátinum upp á 95 prosent.

Dagsins mátiamboð fyri búskaparligum vøkstri halda ikki mál, sigur veðurlagskommisserurin.

– Vøkstur í hesi øldini kann ikki bert snúgva seg um vøkstur í BTÚ. Hvat við at vit oyða alt okkara náttúrutilfeingi og rávørur? Hvat við avleiðingunum fyri heilsu, luftgóðsku og reinum vatni? spyr Connie Hedegaard.