John Zachariassen nýggjur formaður í SEV

Nýggj nevnd tók við í SEV, tá ið elfelagið hevði eykaaðalfund á Hotel Hafnia fyrrapartin í dag. Nývalda nevndin hevur skipað seg við formanni og næstformanni.

John Zachariassen, sum umboðar Norðstreymoy, er nýggjur nevndarformaður í SEV, og Hans Jákup Johannesen er valdur til næstformann, umboðandi Eysturoynna.

Hinir nevndarlimirnir eru: Marin Katrina Frýdal umboðandi Tórshavnar kommunu, Kristian Eli Zachariasen umboðandi Norðoyggjar, Sune Jacobsen umboðandi Vágoynna, Jónsvein Hovgaard umboðandi Suðuroynna, og Vinjard Tungá, sum umboðar Sandoynna.

- SEV skal framhaldandi ganga á odda innan grøna orku. Vit skulu halda eina sterka, skilagóða grøna kós, samstundis sum veitingartrygdin alla tíðina skal vera í hásæti, sigur John Zachariasen, nýggjur nevndarformaður í SEV.

Hesa ferð var øll nevndin nývald. Nýggju nevndarlimirnir avloysa Jákup Suna Lauritsen, sum var nevndarformaður, Boga Andreasen, sum var næstformaður, umframt nevndarlimirnar Karl M. Rasmussen, Frits Poulsen, Bødvar Hjartvarsson, Steinbjørn O. Jacobsen og Karl A. Olsen.

Nevndarval er í SEV fjórða hvørt ár. Nevndarvalið skal sambært viðtøkunum fara fram í seinasta lagi tveir mánaðir eftir, at nýggju bý- og bygdaráðini, sum verða vald um heystið, hava tikið við 1. januar.