Hava borað ein kilometur suður ímóti Selatrað

Arbeiðið at bora vatntunnil suður ímóti Selatrað hevur sum heild gingið eftir ætlan higartil.

Fyrsti kilometurin av teimum 8,4 íalt er nú lagdur afturum, síðani hol varð sett á fjallið 9. september.

Eftir ymsar byrjunartrupulleikar er nú ferð av álvara komin á boringina, og nú eru teir frammanfyri tíðarætlanina. Í miðal verða einir 30 metrar boraðir um samdøgrið.

Tá tað hevur gingið best, hava teir borað útivið 60 metrar. Miðað verður eftir at bora í minsta lagi 600 metrar um mánaðin.

Liðugt í 2013

Eiði 2 Suður samtakið, sum byggifeløgini MT Højgaard og J&K Petersen mynda, stendur fyri arbeiðnum, ið eftir ætlan skal vera liðugt í mars 2013.

Arbeitt verður í tveimum vaktum seks dagar um vikuna, og tilsamans eru 24 mans knýttir at arbeiðnum.

Vatntunnilin úr Skálagjógv omanfyri Norðskála og suður ímóti Selatrað skal savna meira vatn úr áum á vestursíðuni á Eysturoynni til Eiðisverkið hjá SEV.

Tunnilin er 3,35 metrar í diametur

Eiðisverkið eisini útbygt

Vatnorkuútbyggingin fer at økja vatnorkuna hjá Eiðisverkinum við umleið 16 miljónum kilowatt-tímum. Tøka orkan hjá verkinum í løtuni er 40 miljónir kilowatt-tímar.

Úr tunnilinum skulu eisini borast einar 26 slokur upp til áarinntøkini. Slokurnar verða 60 centimetrar breiðar og í onkrum føri upp í 60 metrar langar.

Arbeiðið at gera sjálv áarinntøkini, ið vera eini 20 í tali, verður boðið út fyrst í nýggja árinum, og ætlanin er at fara undir hetta arbeiði í summar.

Í sambandi við útbyggingina skal ein triðja vatnturbina setast upp á Eiðisverkinum, sum tí eisini er undir útbygging í løtuni.

Ætlandi fer samlaði kostnaðurin av Eiði 2 verkætlanini og tilhoyrandi útbyggingum at liggja um einar 150 mió. kr., tá ið avtornar. Arbeiðið verður fíggjað við lántøku og eginpeningi.