Grøna elorkan sløk 49 prosent í 2018

Grøna elorkan var 48,8 prosent av samlaðu elframleiðsluni í 2018, og sostatt stavaðu 51,2 prosent frá oljuriknu verkunum. Vatnorkan stóð fyri 30,7 prosentum av elframleiðsluni í fjør, og tað er 2,6 prosentstig lægri sammett við 2017. Hinvegin var vindorkuframleiðslan tann hægsta nakrantíð í 2018, tá 18,1 prosent av elframleiðsluni komu frá vindorkuni. Í 2017 var lutfallið millum vatn- og vindorku ávikavist 33,3 og 17,8 prosent.

Vindmyllulundin í Húsahaga framleiddi 40 GWt í 2018, og tað er higartil mesta vindorkuframleiðsla í Húsahaga.

Orsøkin til niðurgongdina í vatnorkuframleiðsluni er bæði minni avfall í 2018 og frostbindingar fyrsta partin av árinum. Fyrstu fýra mánaðirnar í fjør regnaði minni, samstundis sum kuldi elvdi til frostbindingar í fleiri vikur, og sostatt rann einki vatn í byrgingarnar, tí regnið frysti í lendinum. Harumframt var serstakliga turt veður í seinnu helvt av mai og fyrru helvt av juni.

Nógv virksemi er í samfelagnum, og tí er áhaldandi stórur vøkstur í eftirspurninginum eftir elorku. Elframleiðslan øktist 5,3 prosent í 2018, tá SEV framleiddi 352 GWt, sum er tað mesta nakrantíð. Vøksturin í elframleiðsluni var tann sami í 2017, tá elframleiðslan var 334 GWt.