Eysturoy og Norðoyggjar eitt rakstrarøki

Norðoyatunnilin hevur eisini havt sína ávirkan á dagliga arbeiðið í SEV.

Eysturoy og Norðoyggjar hava áður verið tvey rakstrarøki, tá talan hevur verið um kaðal- og linjuarbeiði, men tá Norðoyatunnilin var tikin í nýstlu, vóru hesi øki løgd saman.

Landafrøðiligi teinurin millum økini var ov langur, tá ferjusambandið var einasti møguleiki at ferðast millum Eysturoynna og Norðoyggjar, um brek vóru á linjum og kaðlum, og tí var neyðugt at hava Norðoyggjar sum serstakt rakstrarøki. Norðoyatunnilin hevur havt við sær, at linju- og kaðalmenn nú kunnu flyta seg skjótt millum oyggjarnar, og tískil eru økini løgd saman.

Støðin í Skálabotni, sum hevur verið høvuðsstøð fyri Eysturoynna, er nú høvuðsstøð fyri alt økið. Seks linju- og kaðalmenn hava støð í Skálabotni, og tríggir hava støð á Strond við Klaksvík. Hesir níggju kunnu síðani flyta seg runt á øllum rakstrarøkinum eftir tørvi. Hallur Biskopstø er kaðal- og linjumeistari fyri alt økið.

Eitt sonevnt byggilið, sum bert fæst við serlig nýbyggingar- og umvælingararbeiði, var fyri samanleggingina undir kaðal- og linjumeistaranum í Skálabotni, men av tí at hetta rakstrarøkið er vaksið munandi, vísa hesir nú til Jón Nielsen, sum er kaðal- og linjumeistari fyri Streymoy, Vágoy og Sandoy.

Steen Juul Pedersen, sum fyrr var kaðal- og linjumeistari í Eysturoynni, starvast nú í Vestmanna, har hann er vorðin leiðari fyri innkeypinum, høvuðsgoymsluni og verkstaðnum. Harumframt hevur hann eisini um hendi nakrar uppgávur, sum Finn Jakobsen rakstrarleiðari hevur ábyrgdina av.