Elveitingareftirlitið lagt saman við Jarðfeingi
Elveitingareftirlitið verður nú partur av Jarðfeingi.
Vinnumálaráðið boðar í tíðindaskrivi seinnapartin frá, at avgerð er tikin um at leggja saman Elveitingareftirlitið og virksemið hjá Jarðfeingi, sum fevnir um elveitingar- og elorkuøkið.
Tíðindaskrivið er soljóðandi:
Grøn orka
Málini í orkupolitikkinum hjá landsstýrinum eru avbjóðandi, men alneyðug til tess at minka um útlátið av veðurlagsgassum. Ein av størstu avbjóðingunum er, hvussu elveitingarøkið kann tillagast til at nøkta orkutørvin í framtíðini við grønari orku. Tí er elveitingarøkið eitt sera høgt raðfest øki hjá Vinnumálaráðnum.
Fyri at styrkja fyrisitingina og fokuseringina á elveitingar- og elorkuøkinum, er avgerð tikin um at leggja saman Elveitingareftirlitið og virksemið hjá Jarðfeingi viðvíkjandi elveitingar- og elorkuspurningum.
Elveitingareftirlitið fyrisitur elveitingarlógina, og á Jarðfeingi er ein breið vitan um orku og orkuspurningar yvirhøvur. At samla hesar førleikar á sama stað metir Vinnumálaráðið avgjørt verða til fyrimuns fyri elorkuøkið. Ein samanlegging inniber, at Elveitingareftirlitið verður lagt inn í bygnaðin hjá Jarðfeingi.
Fleiri grundgevingar
Grundgevingarnar fyri samanlegging/umskipan av økinum eru m.a. hesar:
- Uppbygging av einum størri fakligum umhvørvi innan umsitingina á elveitingarøkinum.
- Betur at samskipa arbeiðið fyri elveiting og at hava eftirlit við virksemi á økinum.
- Málini í orkupolitikkinum hjá landsstýrinum seta stór krøv til at fremja broytingar innan elveiting í Føroyum. Til hetta er neyðugt, at ein sterk eind við fyrisitingarligum og fakligum førleikum stendur á odda fyri hesum broytingum. Vinnumálaráðið metir, at Elveitingareftirlitið og Jarðfeingi sum ein samlað eind hevur hesar førleikar.
- Samvirkisfyrimunir og effektivisering generelt.
Starvsfólkið hjá Elveitingareftirlitinum flytur til Jarðfeingi og verða ongar starvsfólkabroytingar í hesum viðfangi. Samanleggingin fær virknað frá 1. juli 2011 at rokna, stendur í tíðindaskrivinum frá Vinnumálaráðnum.