Elframleiðslan vaksin 2 pst. higartil í ár

Higartil í ár hevur samlaða elframleiðslan í Føroyum verið 2 prosent hægri enn somu tíð í fjør.

Í september vaks framleiðslan 7,1 prosent í mun til sama mánaða í 2009.

Tað vísir nýggjasta uppgerðin hjá framleiðsludeildini hjá SEV.

Vøkstur uppá 4,1 GWt

Higartil í ár eru framleiddir 205,7 GWt ímóti 201,6 GWt somu tíð í fjør. Av hesum stava sløk 27 pst. frá vatni og vindi í mun til sløk 34 pst. somu níggju mánaðir í fjør.

Orsøkin til minkingina er í høvuðsheitum, at vatnorkuframleiðslan í Vestmanna tað mesta av summarinum hevur verið darvað av ymsum umvælingum og viðlíkahaldsarbeiði.

Vøksturin í framleiðsluni higartil í ár stavar frá meginøkinum, har talan er um eina øking uppá 2,5 prosent. Hinvegin fall elframleiðslan í Suðuroy 1,9 pst.

Stórur vøkstur í september

Samlaða framleiðslan í september vaks 7,1 pst. í mun til sama mánaða í fjør: úr 21,4 GWt til 22,9 GWt. Her stavaðu sløk 21 prosent frá vatni og vindi. Framleiðslan í meginøkinum vaks 7,7 pst. og í Suðuroy 1,3 pst.

Í 12 mánaðarskeiðnum frá 1. oktober í fjør til 30. september í ár vaks samlaða elframleiðslan 1,4 pst. í mun til sama tíðarskeið frammanundan: úr 275,8 GWt til 279,6 GWt. Sløk 34 pst. stavaðu frá vatni og vindi ímóti 40 pst. árið fyri.