Elfeløg í Danmark leggja saman

Elfeløgini Elforsyningen Nordvendsyssel og Elforsyningen Sydvendsyssel verða nú til Nord Energi.

Tey bæði elveitingarfeløgini, ENV og ESV, samtyktu á umboðsfundum í gjárkvøldið at virka fyri eini samanlegging, sum skal endaliga samtykkjast í vár við afturvirkandi gildi frá nýggjárinum, skrivar danskenergi.dk.

Nord Energi verður størsta elveitingarfelagið í Norðurjyllandi, og sum frálíður er málið at savna alla elveitingina í Norðurjyllandi í einum felag. 

Brúkararnir eiga bæði ENV og ESV. Endamálið við samanleggingini er at minka um útreiðslurnar til gagns fyri elbrúkararnar.

ENV og ESV hava tilsamans 140 fólk í arbeiði. Samanleggingin ber í sær eina minking í talinum á arbeiðsplássum, men roknað verður við, at hetta í høvuðsheitum kann gerast við natúrligari frágongd.

Aðrar samanleggingar í umbúnað

Eisini í hinum landspørtunum í Danmark verður arbeitt við at skipa seg í eitt stórt elfelag ístaðin fyri at hava fleiri feløg í sama øki.

Í síðstu viku samtykti Verninge Transformerforening at upploysa felagið og leggja alt virksemið saman við Energi Fyn.

Samanleggingin ber í sær, at allir limirnir í VT verða lutaeigarar í Energi Fyn undir somu treytum sum hinir 165.000 lutaeigararnir í felagnum.

- Stór krøv verða í dag sett eigarum av elveitingarnetum, og tað verður truplari og truplari sum lítið felag at fylgja við og lúka hesi krøvini, sigur Per Kania, formaður í Verninge Transformerforening, sum grundgeving fyri at leggja saman við Energi Fyn.

Samanleggingin fær eftir ætlan gildi á nýggjárinum.