Elbilasølan í Bretlandi lítil og eingin
Bretland fær óvæntaða mótstøðu í strembanini at halda veðurlagsniðurskurðin, landinum er álagt innan 2020.
Hóast parlamentslimir, sjónvarpsstjørnur og onnur kend fólk hava gingið á odda til tess at gera elbilar til eitt vørumerki í Bretlandi, eru nýggju tølini vánalig tíðindi fyri elbilafjepparar.
90 prosent niður
Alt árið í fjør vórðu bert 55 nýggir elbilar skrásettir í Bretlandi.
Hetta er ein afturgongd uppá ikki minni enn 90 prosent í mun til metárið 2007, tá 397 elbilar vórðu skrásettir, skrivar The Guardian sambært Teknisk Ukeblad.
Nýggju tølini frá áhugafelagnum hjá bretska motorídnaðinum koma stutt undan, at bretska stjórnin setir í verk elbila-stuðul uppá 5.000 nkr. fyri hvønn bil.
Fólk bíða
Goingreen, veitarin av mest selda elbilinum í Bretlandi, G-Wiz, heldur, at ein av orsøkunum júst kann vera fráboðaði stuðulin.
– Mong bíða helst eftir stuðlinum frá stjórnini, áðrenn tey keypa sær ein elbil, sigur dagligi leiðarin Rudi Schogger við The Guardian.
Richard Dyer í umhvørvisfelagsskapinum Friends of the Earth er vónsvikin.
Vónar framgongd
– Sølutølini eru sera skuffandi. Orsøkin kann vera fíggjarkreppan og so sannroyndin, at elbilar eru dýrari enn vanligir bilar. Men ríkisstuðulin, ið kemur í januar, fer vónandi at økja um søluna í framtíðini av elbilum, sigur Dyer.
Eisini vanligir bilar høvdu minni sølutøl í fjør. 2 miljónir nýggir bilar vórðu skrásettir í Bretlandi í 2009. Hetta er tað lægsta síðani 1995.
Men afturgongdin hjá elbilunum var átta ferðir størri.