El er lykilin til at skerja CO2

Nordenergi hevur júst sent norðurlendsku umhvørvismálaráðharrunum skriv, har staðfest verður, at el er lykilin til at lækka útlátið av CO2.

Nordenergi, sum er samstarvsfelagsskapurin hjá norðurlendsku orkuvinnufeløgunum, heitir á norðurlendsku ráðharrarnar um at taka hetta og aðrar boðskapir við, tá evropeisku umhvørvismálaráðharrarnir hittast á fundi 21. juli. Her skulu teir m.a. viðgera visjónir fyri CO2-fríum samfeløgum í 2050.

Norðurlendsku vinnufeløgini - eitt nú Dansk Energi - hava hvør sær gjørt visjónir fyri eini CO2-neutralari orkuskipan fram ímóti 2050.

Onnur átøk eisini neyðug

- Vit hava sett hesar ætlanir saman og gjørt fleiri tilmæli, sigur Charlotte Søndergren, ráðgevi hjá Dansk Energi og limur í stýrisbólkinum í Nordenergi, við danskenergi.dk.

Umframt at el er lykilin, vísir Nordenergi á, at kvotuhandilsskipanin hjá ES skal styrkjast til at vera høvuðsamboðið í fremjanini av íløgum í CO2-fátæka tøkni. Nordenergi heldur eisini ein vælvirkandi elmarknað vera neyðugan til tess at gagnnýta orkuna best møguligt. Orkueffektiviseringar eru somuleiðis týdningarmiklar fyri at røkka málinum.

- Eisini gransking og menning eru neyðug. Her mæla vit til, at ES-nevndin tekur stig til at gera eina evropeiska ætlan fyri, hvussu orkuskipanin skal mennast til at kunna taka ímóti stórum nøgdum av varandi orku, sigur Charlotte Søndergren.