Donsk húski við í orkusparingarátaki

Í mars í fjør søkti danska orkufelagið NRGi eftir húskjum at luttaka í eini verkætlan um orkusparingar. NRGi Húskið varð verkætlanin kallað.

Endamálið var at fáa so mong góð spariráð til vega sum gjørligt til gagns fyri bæði brúkarar og orkuframleiðara.

Á nýggjárinum vóru 160 húskir við í verkætlanini, og tey eru nú farin undir at býta út góð orkuspariráð sínámillum, skrivar Jyllands-Posten.

Eitt gott fyridømi

Tove Lise og Aage Lund í Tranbjerg eru eitt av húskjunum, ið hava verið við í verkætlanini síðani byrjan, og tey hava framt fleiri ítøkilig átøk til tess at spara orku í 2010.

M.a. hava tey bjálvað av nýggjum á loftinum og í einum krúpikjallara. Nýggir rútar eru settir í, skift er til lágorkuperur og ein oljufýringarpumpa er eftirhugd. Harðar hvítvørur eru skiftar út við lágorku, og turkitrumlan er avloyst av einum toysnóri í bilskýlinum.

Samanlagda úrslitið av hesum er: 2.000 kilowatttímar færri á elrokningini - svarandi til ein kontantan vinning upp á uml. 3.800 kr.

Fáið børnini við

Bestu ráðini hjá Aage Lund til elsparing snúgva seg tó ikki um at byggja um og skifta hvítvørur út. Tað snýr seg harafturímóti um at fáa motiverað børn og ung til at spara - tað ger alt nógv lættari, sigur hann.

- Yngsti sonur okkara, 11 ára gamli Mads, er størsti orkuspararin hjá okkum. Hann fylgdi nógv við í nøkrum sjónvarpssendingum fyri tveimum árum síðani - tær snúðu seg um at spara orku, og hann gjørdist rætt og slætt ein orkusparifanatikari. Hann leggur stóran dent á at sløkkja ljósið eftir seg sjálvan og stórubeiggjarnar, og tað kann næstan vera pínligt at hava hann við í býin, tí hann spyr fólk, um tey hava spariperur og tílíkt. Og hetta er ikki nakað, vit hava fingið hann til. Hann gekk uppí hasa sjónvarpsrøðina við lív og sál, sigur Aage Lund í tíðindaskrivi frá NRGi.

Tey 160 húskini í verkætlanini býta í løtuni góðu ráðini sínámillum á einum felags forumi á heimasíðuni hjá NRGi, men almenningurin er eisini vælkomin at kaga inn og taka tey til sín.

Vit loyva okkum her at geva nøkur av ráðunum víðari til lesarar okkara:

• "Kog æg i en passende gryde og fyld vand i til halvdelen af æggene er dækkede. Læg tætsluttende låg på. Når vandet koger, slukkes kogepladen, og vandet koger videre på eftervarmen i 11 min."