Dong Energy og Scottish Power Renewables, sum spaniólar eiga, ætla í felag at byggja eina 389 MW stóra sjóvindmyllupark undir navinum West of Duddon Sands í Írska Havinum.
Parkin fer at kosta útivið 14 miljardir krónur – íroknað flutningssambond – og skal eftir ætlan gera streym um trý ár – í 2014, tá hon verður ein av heimsins størstu sjóvindmylluparkum.
West of Duddon Sands skal veita streym svarandi til ársnýtsluna hjá umleið 300.000 bretskum húsarhaldum. Siemens Wind Power skal gera myllurnar, sum verða upp á 3,6 MW og 108 í tali.
Anders Eldrup, aðalstjóri í Dong Energy, gleðir seg sambært ing.dk til samstarvið við Scottish Power Renewables:
Eiga átta aðrar sjóvindmylluparkir
- West of Duddon Sands verður níggjunda sjómylluparkin hjá Dong Energy í Bretlandi, og undirstrikar harvið støðu okkara sum marknaðarleiðari innan sjóvind, sigur hann.
Írska Havið er í dag ein av týdningarmestu deplunum í Bretlandi fyri vindorku. West of Duddon Sands verður framhald av Walney 1 og 2 sjóvindmylluparkunum hjá Dong Energy. Hesar báðar sjóvindmylluparkirnar verða settar í rakstur í 2011 og hava ein samlaðan kapasitet upp á 367 MW.
Dong Energy og Belfast Havn skrivaðu í februar í ár undir eina ætlan, har havnin í Belfast bindur seg til at byggja eina nýggja skræddaraseymaða útgerðarhavn, sum Dong Energy skal leiga frá teimum. Nú verður seinasta hond løgd á hesa avtaluna.