Danmark kann drukna í vindmyllum á sjónum

Danski parturin av Norðsjónum er egnaður til sjóvindmylluparkir, men spurningurin er, hvat náttúrufólk fara at siga til eitt broytt útsýni yvir Vesturhavið.

Tað er somikið bíligt at byggja sjóvindmyllur í danska partinum av Norðsjónum, at onnur lond kunnu spara miljardaupphæddir við at flyta sínar vindmyllur til grunnu donsku farvøtnini, sigur ein frágreiðing.

Verkætlanin Windspeed hevur gjørt frágreiðingina og tilmælini, ið ES-nevndin hevur goldið, skrivar tíðarritið Ingeniøren.

Sleppið øllum øðrum ætlanum

- Vit fáa eina rúgvu av el-framleiðslumøguleikum, um myllurnar ikki verða knýttar saman við landinum, tær verða settar upp í, sigur Hans Christian Sørensen frá ráðgevingarfyritøkuni Spok, ið luttekur í altjóða bólkinum aftanfyri verkætlanina.

Um politikarar í t.d. Bretlandi, Týsklandi pg Holland sleptu sínum heimligu útbyggingarætlanum, og brúka donsku farvøtnini, ber sambært frágreiðingini at trífalda orkukapasitetin, svarandi til 30 pst. av elnýtsluni hjá Norðsjóvarlondunum.

Hetta kann gerast, uttan at prísurin fyri vindmyllustreymin verður hægri enn aktuelli prísurin upp á góða 1,5 kr. fyri kilowatttíman, skrivar Ingeniøren.

Høvuðstrupulleikin er, at prísurin á sjóvindmyllum hækkar, tess longur úr landi og tess djypri er, har bygt verður.

Trupult at finna hóskandi øki

Frágreiðingin sigur eisini, at fleiri Norðsjóvarlond skjótt fara at hava trupult við at finna nóg grunn sjóøki, sum ikki longu eru løgd út til siglingarrutur, fiskivinnuáhugamál, friðaðar náttúruleiðir ella boripallar. Men eisini her er grunni danski parturin av Norðsjónum væl egnaður, stendur í frágreiðingini frá Windspeed.

Tó eru samstarvsmøguleikarnir eisini skerdir, tí fleiri lond síggja vindorku sum eina tøkni og ídnaðargrein, sum tey skulu liva av í framtíðini, og her telja tjóðskaparlig atlit meira, vísa fleiri serfrøðingar á, sum Ingeniøren hevur tosað við.