7 oyggjar ikki samanbundnar við høvuðsnetið hjá SEV
Umframt at hava ábyrgd av, at veitingartrygdin og elgóðskan er nøktandi, hevur SEV sambært elveitingarlógini skyldu at framleiða og flyta el til allar íbúgvar í landinum.
Sum er eru 7 oyggjar ikki samanbundnar við elnetið í meginøkinum. Tær eru Suðuroy, Koltur, Mykines, Skúvoy, Fugloy, Lítla Dímun og Stóra Dímun. Hesar oyggjar hava síni egnu elverk, sum SEV eigur.
Meginparturin av elframleiðsluni í Føroyum verður framleiddur á 10 stórum framleiðslustøðum (góð 98%), meðan ein lítil partur (undir 2%) verður framleiddur á teimum 17 smáverkunum (harav 9 flytilig), sum ikki eru knýtt í høvuðsnetið.
Framleiðslan á smáverkunum er øll grundað á dieselolju, har framleiðsluútreiðslurnar eru lutfalsliga stórar.
280 mió. kWt
Samlaða elframleiðslan í Føroyum í 2010 var 280 mió. kWt. Ein vøkstur upp á 1,8% í mun til 2009.
29% av framleiðsluni vóru frá varandi orku ímóti 39% árið fyri. Høvuðsorsøkin til stóra fallið var, at 2010 var eitt óvanliga turt ár.
Býtið millum vatn-, vind- og oljuframleiðslu í 2010 var í avrundaðum tølum ávikavist 69.000 MWt, 12.500 MWt og 198.500 MWt.
Vatn og vindur
Vatnorkan verður framleidd á vatnverkunum í Vestmanna, í Botni, á Eiði og á Strond.
SEV hevur einkarrætt at nýta vatnorkuna til elmegi í 50 ár, frá 1963 til 2013. Sostatt gongur einkarrætturin út um smá tvey ár.
Vindorkan umboðar í løtuni 4-5% av samlaðu elframleiðsluni. Í løtuni eru 7 vindmyllur í Føroyum - tríggjar á Mýrunum í Vestmanna, sum sp/f Røkt eigur, og 4 í Neshaga í Eysturoynni, sum SEV eigur.
Elveitingareftirlitið, sum síðani 1. januar 2009 hevur umsitið vindorkuna, hevur boðið 3 MW av vindi út aftrat, og fimm umsøkjarar eru undangóðkendir at søkja um endaligt loyvi. Umsóknarfreistin er 11. februar.
Netvirksemið
Umframt at standa fyri 98% av elframleiðsluni (Røkt framleiðir írestandi 2%), eigur og rekur SEV eisini føroyska elkervið.
Netvirksemið er bindiliðið millum framleiðsluverkini og brúkaran. Netvirksemið fevnir um (ikki dagførd tøl, sum tí skulu takast við fyrivarni) 455 transformarastøðir (býttar á 6, 10, 20 og 60 kV anlegg), 24.000 málarar, 5.674 0,4 kV kápilskáp, 443 km av linjum, 1192 km av landkaðalum og umleið 25 km av sjókaðalum.
Transformarar eru á 13 oyggjum.