65 prosent grøn elorka fyrra hálvár 2015

Fyrra hálvár 2015 framleiddi SEV 65,2 prosent av allari elorkuni úr vatni og vindi. Tað eru 15 prosentstig meira enn sama tíðarskeið 2014, tá ið elframleiðslan úr varandi orkukeldum var 50,2 prosent.

Her skal havast í huga, at øktur elorkutørvur hevði við sær, at elframleiðslan vaks fimm prosent fyrra hálvár 2015, sammett við sama tíðarskeið 2014, samstundis sum SEV megnaði at økja grønu elframleiðsluna munandi.

Oljunýtslan hjá SEV minkaði 4.100 tons í tíðarskeiðnum januar til juni 2015, samanborið við sama tíðarskeið 2014. Elframleiðslan úr olju minkaði 26,6 prosent fyrra hálvár 2015, sammett við sama tíðarskeið í fjør.

Tá ið einans grønu elframleiðslutølini verða samanborin fyri bæði tíðarskeiðini við støði í veruligu GW-tímunum, er talan um 36,4 prosent økta elframleiðslu úr vatni og vindi fyrra hálvár 2015. Hyggja vit at vatninum og vindinum fyri seg, so øktist elframleiðslan úr vindi 177 prosent fyrra hálvár 2015, sammett við sama tíðarskeið 2014, og elframleiðslan úr vatni øktist 12,7 prosent.

Tað eru vindmyllurnar í Neshaga og Húsahaga, útbyggingar á Eiðisverkinum, nýggi tunnilin oman fyri Norðskála suður ímóti Selatrað umframt tøkniligar tillagingar í allari elskipanini, sum eru høvuðsorsøkin til góðu gongdina innan elframleiðslu úr varandi orkukeldum.