Varðagøtan fram til 2030

Kósin er sett móti málinum um 100% burðardygga elorku á landi í 2030.

Men hvussu náa vit málinum? Hvørjar útbyggingar skulu gerast, hvussu stórar skulu tær vera, nær skulu tær gerast, og hvar skulu tær gerast?

Varðagøtan fram móti 2030 vísir, hvussu vit á skilabestan hátt náa hesum máli. Varðagøtan verður dagførd regluliga, og fyrilit verður havt fyri nýggjum tøkniligum loysnum, kostnaðarmetingum v.m. Sum sæst, er sjóvarfalsorka enn ikki partur av varðagøtuni. Tá royndarverkætlanin í Vestmannasundi er av, vita vit betur, um og hvønn leiklut hon skal hava í útbyggingarætlanini.

Metti kostnaðurin av útbyggingunum á grønu kósini, sum hon sær út nú, er uml. 2,5 - 3,0 mia. kr.